उत्तराखण्ड विकास पार्टी न गैरसैंण तै राजधानी बणाणक मांग कै

कोटद्वार : उत्तराखण्ड विकास पार्टी क उपाध्यक्ष पूरण सिंह भण्डारी न बोली कि बाइस साल भौत हूंदा छन । यौं बाइस सालों मा  राजधानी का सर्या काम देहरादून बिटि ही हूंदा रै मगर पहाड़ क विकास नि ह्यूए पै। त अगर भाजपा कांग्रेस का मनखी पहाड़ का विकास क प्रति गम्भीर छन त ऊँ तै तुरंत ही गैरसैंण तै राजधानी घोषित कर दींण चैन्द । पूरण सिंह भण्डारी न बोली कि यौं बाइस सालों मा पहाड़ त पहाड़ देहरादून क भी नास ह्यूए गै च । बासमती चौंल और लीची कुंण फेमस शहर मा आज ढंग क बासी चौंल भी नि मिलणा छन। उन बोली कि गढ़वालियों क शान देहरादून शहर क डेमोग्राफी भी बदलना च।  ये तै भी गढ़वाली बर्दास्त नि कर सकदा छन। ऊण बोली कि भरतु दिदा क प्रेरणा हम गढ़वालियों मा च। उबरी हम नौना ही छै मगर अजै भी गढ़वाली अस्मिता क पैछाण भरतु दिदा ही च और हम तै मजबूर नि करा जावा कि हम तै भरतु दिदा क सौगंध उठाण पड़ जै। उन बोली कि तत्काल प्रभाव मा गैरसैंण तै राजधानी घोषित क़ै जै निथर मुख्यमंत्री न अजै चुनौ भी लड़णु च तबरी दिक्कत ह्यूए जाली।