उत्तराखण्ड मा हूंणी भर्ती परीक्षाओं क सीबीआई जाँच हूंण चैन्द – उविपा

कोटद्वार : उत्तराखण्ड विकास पार्टी न उत्तराखण्ड अधीनस्थ सेवा चयन आयोग मा ह्यूए सभ्या भर्तियों पर लगणा वाला आरोपों क जाँच सीबीआई बिटि करै जाणक मांग कै। उत्तराखण्ड विकास पार्टी क सचिव एडवोकेट जगदीश चन्द्र जोशी न बोली कि हर भर्ती मा उत्तराखण्ड अधीनस्थ सेवा चयन आयोग द्वारा करै गै परीक्षाओं पर लगातार सवाल उठना छन और आयोग द्वारा निजी एजेंसी का माध्यम बिटि परीक्षा करै जाण भी ये मामला मा सन्देह उत्पन्न करदू च, अगर निजी कम्पनी बिटि ही परीक्षा कराण च त बीच मा उत्तराखण्ड अधीनस्थ सेवा चयन आयोग तै लांणक जरूरत ही क्या च। एडवोकेट जोशी न बोली कि सभ्या विभाग सीधा ही निजी कम्पनी तै ठेका दए सकदा छन।

एडवोकेट जोशी न बोली कि प्रश्न पत्रों मा कुछ प्रश्नों मा ह्यूए गड़बड़ी बतांदी च की अधीनस्थ सेवा चयन आयोग अपणी जिम्मेदारी नि निभा पाणु च, ये क खिलाफ कार्यवाही इलै नि हूंणी च कि शासन का कुछ मनखी ये गड़बड़ियों तै सपोर्ट करणा छन। उन बोली कि एनसीआरटी मा बतै गे आंसर अगर गलत च त एनसीआरटी तै अवगत करै जाण चैन्द ताकि दूध क दूध, पाणी क पाणी ह्यूए जै, मगर आयोग क ये बुलणु कि हमर एक्सपर्ट क आंसर जो च वो ही सही च बतान्दू च कि घपरोल छुट्टू मूट्टू नि च पूरी दाल ही काली च।

 इलै यों भर्ती परीक्षाओं क सीबीआई जाँच हूंण चैन्द।