posted on : अप्रैल 9, 2022 12:36 अपराह्न
कोटद्वार : उत्तराखण्ड विकास पार्टी न प्रदेश मा “एक समान शिक्षा” नीति लागू करणक मांग कै च। उत्तराखण्ड विकास पार्टी क उपाध्यक्ष राजपाल सिंह रावत न बोली कि , अजै उत्तराखण्ड तै समान आचार संहिता क बजै एक समान शिक्षा नीति क जरूरत च। उन बोली कि भाजपा तै संविधान क सम्मान करणु चैन्द। भारत क संविधान भारत का सब्या नागरिकों तै समान शिक्षा क अधिकार दीन्दू च, मगर पैल कांग्रेस न येक दुरूपयोग कै और अजै भाजपा करणी च। उन बोली कि उत्तराखण्ड का सभ्या नौनिहालों तै एक समान शिक्षा मिलणी चैन्द । पहाड़ का नौ जिलों का नौना नौनियों तै हक च कि जै स्तर क शिक्षा देहरादून , हरिद्वार, उधमसिंह नगर क नौना प्राप्त करणा छन, वे स्तर क शिक्षा ऊँ तै भी उपलब्ध करै जै।
राजपाल सिंह रावत न बोली कि निजी विद्यालय, विद्यालय नि रै गे छन । लूट क अड्डा ह्यूए गै छन। जौंका अग्नै बड़ा बड़ा अधिकारी भी और खुद शिक्षा अधिकारी भी पाणी भरणा छन। राजपाल सिंह रावत न बोली कि शिक्षा नीति मा आमूलचूल बदलावक जरूरत च। और समान शिक्षा क मतलब केवल किताब भर नि हून्दू च। एक समान शिक्षा नीति पर विचार विर्मश करणक सख्त आवश्यकता च।
